ענגלאנד האט זיך באנוצט מיט די אימיגראציע קריזיס, צו העלפן אן איראנער וויסנשאפטלער וואס האט געוואלט דעפעקטירן צו די מערב וועלט, מיט די הילף פון די אמעריקאנער און איזראעלישער שפיאנאזש אגענטורן.
דער 47 יעריגער איראנער וויסנשאפטלער איז אנטלאפן דורך א אויפבלאז שיפל פיל מיט איראנער אימיגראנטן, וועלכע האט אריבערגעשפרייזט די ענגלישער קאנאל פון פראנקרייך קיין בריטאניע, און האט דערגרייכט די שטאט קענט עטליכע טעג בעפאר די נייע יאר.
די אקציע איז דורכגעפירט געווארן אין א געמיינזאמע מיסיע צווישן די ענגלישע MI6 שפיאנאזש אגענטור, די אמעריקאנער CIA און דער איזראעלי מוסד.
דער איראנער וויסנשאפטלער האט ביי זיך גאר ווערדפולע אינפארמאציע איבער די נוקלעארער פראגראם פון איראן, און ער איז שוין גענוצט געווארן דורך איראנ’ס פיינט פאר לאנגע יארן ארויסצוהעלפן מיט שפיאנאזש קעגן איראן.
צווישן די זאכן אויף וואס ער באקומט קרעדיט, איז מיטן פאקטיש העלפן אפווישן אכמאד ראשאן פון מאפע. ראשאן איז געווען א גאר געלונגענער איראנער וויסנשאפטלער וועלכער איז געשטארבן פון אן אויפרייס אין זיין קאר, אין יאר 2012, עפעס וואס איז געווען א שטארקער קלאפ פאר די פארשריט און אנטוויקלונג אויף די איראנער נוקלעארער פראנט.
די פלענער אים צו ארויסראטעווען פון איראן און אים ברענגען קיין טערקיי, און פון קארט קיין ענגלאנד, איז שוין פלאנירט געווארן אין אקאטבער.
מען האט אים נישט געקענט אריינברענגען קיין ענגלאנד דורך די אפיציעלע לופטפעלד צוליב זיכערהייט סיבות, און דאן איז די מוסד אויפגעקומען מיט א פלאן אים צו שמוגלען אין א שיף מיט אימיגראנטן, וואס דאס איז געווען א געלונגענע אקציע.
